Հարգելի հաճախորդ

Ուրախ ենք հյուրընկալել Ձեզ «Պանդոկ Երևանի» գեղեցիկ սրահներում, որտեղ Ձեզ է սպասում գնի, որակի և սպասարկման հիանալի համադրությամբ համեմված անզուգական միջավայր: «Պանդոկ Երևանի» ճաշացանկը հագեցած է բազում ճաշատեսակներով, որն ամփոփում է մեր ժողովրդի մշակույթը՝ սիրված և դարերով ստուգված ու մեր օրեր հասած կերակրատեսակներով: Ճաշացանկը պատրաստելիս մենք առաջնորդվել ենք մի պարզ սկզբունքով. հրամցնել զուտ հայկական, բայց հանիրավի մոռացված կամ մոռացման եզրին գտնվող կերակուրներ, ինչպես նաև՝

կովկասյան խոհանոցի լավագույն նմուշներ, որոնք հարիր են մեր հաճախորդների քիմքին, բայց յուրատիպ են ու փոքր-ինչ տարբեր:

Մեր հաջողության գրավականը մատուցվող ճաշատեսակների բարձր որակն ու բազմազանությունն է, մշտապես թարմացվող ճաշացանկը, օգտագործվող թարմ սննդամթերքից պատրաստված խոհարարական բարձր արվեստի նմուշները և սպասարկող անձնակազմի բարյացակամ վերաբերմունքը: «Պանդոկ Երևանի» ներքին հարդարումը, որն աչքի է ընկնում իր հարմարավետությամբ, ներդաշնակությամբ և յուրօրինակ դեկորով, ստեղծված է բավարարելու նույնիսկ ամենախստապահանջ հաճախորդին: Այստեղ Դուք Ձեզ կզգաք ինչպես տանը` անկաշկանդ և ուշադրությամբ պարուրված, կհամտեսեք հայկական խոհանոցի անզուգական բարիքները ազգային երաժշտության մեղմիկ ելևէջների ներքո:

Այցելեք «Պանդոկ Երևան», որտեղ Դուք կարող եք անցկացնել գործնական հանդիպումներ, կազմակերպել գեղեցիկ միջոցառումներ և անմոռանալի ընտանեկան խնջույքներ:

Մայր քաղաքիս համն ու հոտը

ՌԵՍՏՈՐԱՆՆԵՐ

close
close
close
close

ՇԵՖ ԽՈՀԱՐԱՐ

ԹԱՐՄ ՄԻՍԸ «ՊԱՆԴՈԿ ԵՐԵՎԱՆԻ» ԱՄԵՆԱԿԱՐԵՎՈՐ ԲՆԱՄԹԵՐՔՆ Է ԵՎ ՀԱՋՈՂՈՒԹՅԱՆ ԳՐԱՎԱԿԱՆԸ

Մեր կողմից թարմ մսից մատուցվող բազում ճաշատեսակներն են հիմնական դրդապատճառը, որ արդեն 10 տարի է, ինչ չի դադարում հաճախորդների հոսքը «Պանդոկ Երևան»: Նրանք համոզված են, որ այն, ինչ համտեսում են այստեղ պատրաստված է թարմ և բարձրակարգ մսից:

Այժմ անդրադառնանք մեզ մոտ օգտագործվող մսամթերքի առանձնահատկություններին:

Այսպես, տավարի մսի պարագայում հարկ է նշել, որ մենք պատվիրում ենք մինչև 100 կգ ցուլիկների միս, որոնց սննդակարգում ներառված է միայն գարի, առվույտ և ջուր: Այս սննդակարգով պահված տավարի միսը մեծապես տարբերվում է այլ տավարի մսից իր համով, նրբությամբ և փափկությամբ, ինչպես նաև՝ գույնով. այն լինում է վարդագույն: Չպետք է մոռանալ նաև բնակլիմայական պայմանների մասին, որոնք մեծապես ազդում են տավարի մսի որակի վրա: Օրինակ, մեր ճաշացանկում հիմնականում օգտագործվում է Եղեգնաձորից բերված տավարի միսը, որն իր համային որակներով տարբերվում է այլ մարզերում պահվող տավարից:

Մեր ռեստորանի սննդակարգում ներառված են՝ հատուկ պայմաններով հագեցած գոմերում պահված մինչև 30 կիլոգրամանոց էգ խոզից կամ գոճուց պատրաստված ճաշատեսակներ: Այս չափորոշիչներն առանցքային են, քանի որ արդյունքում միսն ավելի փափուկ և նուրբ է լինում` զուրկ խոզի մսին հատուկ հոտից, ինչպես նաև ստացվում է մսի և ճարպի համաչափ շերտավորում, ինչն էլ կարևորվում է մեր` խոհարարներիս կողմից:

Եվ վերջապես, «Պանդոկ Երևանի» հաճախորդների կողմից շատ սիրված գառան մսից պատրաստված ճաշատեսակները հատուկ են այն պարզ պատճառով, որ մեզ մոտ մատուցվում է մինչև 11 կգ գառ, որն առանձնանում է իր փափուկ մսով և քիմքին հաճելի համով: Տվյալ մսատեսակը հիմնականում բերվում է Սյունիքի մարզից: Այս գեղեցիկ լեռնային գոտուն հատուկ կլիման, օդն ու ջուրը, մասնավորապես իրենց բուժիչ հատկություններով հայտնի խոտերի բազմազանությունը, անշուշտ, դրական են անդրադառնում այստեղ պահվող գառան մսի որակային հատկանիշների վրա: Ի դեպ, մենք համագործակցում ենք այդ մարզում գործող մի շարք ֆերմերային տնտեսությունների հետ:

Չեմ կարող չանդրադառնալ նաև մեր խոհարարների բարձր մասնագիտական պատրաստվածությանը, որոնք եվրոպական և ասիական երկրներում կուտակած իրենց փորձով, խոհարարական գիտելիքներով ու հմտություններով, ինչպես նաև այս գործի նկատմամբ ցուցաբերած նվիրվածությամբ ստեղծում են ոչ թե կերակուրներ, այլ պարզապես արվեստի գործեր:

Այժմ Ձեզ եմ առաջարկում մեկ բաղադրատոմս «Պանդոկ Երևանի» ճաշացանկից, որը հուսով եմ կդառնա Ձեր կողմից սիրված և տարբեր առիթների համար հաճախ պատրաստող ճաշատեսակ:

Բաղադրատոմս

Հորթի փափկամիս (150 գ.), սունկ շամպինյոն (70 գր.), հոլանդական պանիր (40 գր.), ընկույզ (30 գր.), զեյթունի ձեթ, թթվասեր, ալյուր աղ:

Պատրաստման եղանակ

Վերցնել 150 գ. հորթի փափկամիս, ծեծել այնքան, որ բարակի մինչև 0,5 սմ և տապակել զեյթունի ձեթի մեջ: Նույն թավայի մեջ տապակել 70 գր. մանր կտրատած շամպինյոն: Այնուհետև տապակած սունկը դասավորել մսի վրա և վրան ավելացնել 40 գր. հոլանդական պանիր: Սոուսը պատրաստելու համար նույն թավայի մեջ լցնել 30-50 մլ. եռացրած ջուր և ծածկել կափարիչով, որպեսզի նորմալ կրակի վրա մեկ րոպե եփի: Ջրի մեջ ավելացնել 30 գր. ընկույզ, փոքր-ինչ ալյուր և խառնել: Վրան ավելացնել 1 թեյի գդալ թթվասեր և սոուսը լցնել լանգետի վրա: Խավարտը մատուցել ըստ ճաշակի:

ՄՇԱԿՈՒՅԹ

Երևան

close

Երևան

Հայաստանն աշխարհի հնագույն բննօրաններից է, որի մայրաքաղաքը` Երևանը, գտնվում է Հայկական Լեռնաշխարհի կենտրոնական մասում` Արարատյան դաշտավայրի հյուսիս-արևելյան եզրին: Այն զբաղեցնում է շուրջ 230 քառ. կմ տարածք` ծովի մակերևույթից 900-1300մ. բարձրության վրա:

Երևան

Երևանն ունի գեղատեսիլ համայնապատկեր, որը հյուսիսից եզերում են քառագագաթ Արագածի և Արայի լեռնազանգվածները, իսկ հարավից` բիբլիական Արարատը՝ ինչպես երկինք մխրճված երկգլուխ հզոր արծիվ։

Երևան

Ըստ հնագիտական, երկրաբանական և հնէաբանական տվյալների` Երևանի տարածքից հայտնաբերված մարդկային մշակույթի հնագույն հուշարձաններն ու մեզ հասած բեկորները շուրջ մեկ միլիոն տարվա վաղեմություն ունեն: Պահպանված քարե և վաղ երկաթի դարերի հուշարձանները վկայում են այս բնակավայրում մարդու զարգացման բոլոր աստիճանների անընդմեջ գոյության մասին:

Երևան

Բնականաբար, երեքհազարամյա պատմության ընթացքում Երևանի հնագույն հուշարձաններից շատերը չեն պահպանվել, քանի որ առևտրական ճանապարհների խաչմերուկներում գտնվող քաղաքը հաճախակի վերածվել է պատերազմական գործողությունների թատերաբեմի:

Երևան

Պատմական Հայաստանի տասներկուերորդ մայրաքաղաք Երևանը հիմնադրվել է մ.թ.ա. 782 թվականին` Ուրարտուի /Արարատյան թագավորություն/ արքա Արգիշտի 1-ինի կողմից` որպես Էրեբունի ամրոց: Այս մասին է փաստում ուրարտական սեպագիր արձանագրությունը, որը Երևանի ծննդյան վկայականն է:

Հիրավի, Երևանն աշխարհի հնագույն քաղաքներից է և անգամ «Հավերժական քաղաք» Հռոմը շուրջ 28 տարով նրանից երիտասարդ է:

Երևան

1918 թվականից դառնալով Հայաստանի 1-ին, ապա նաև 2-րդ և 3-րդ հանրապետությունների մայրաքաղաքը` Երևանի անցած ճանապարհը մեկ անգամ չէ, որ բախվել է ճակատագրական վայրուվերումներին: Դրա վկան ավանդական ճարտարապետությանը համադրված տարբեր ժամանակների ու ոճերի կառույցներն են, որ յուրօրինակ, հաճախ նաև անսպասելի պատկերներ են ուրվագծում` արտածվելով ժամանակի ընկալումներից ու պահանջներից, երբեմն նույնիսկ հակադրվելով միմյանց:

Երևան

Հայկական կոնյակ

close

Հայաստանում կոնյակի արտադրությունը հիմնադրվել է 1887թ.-ին վաճառական Ներսես Թահիրյանի /Նիկոլայ Թաիրով/ կողմից, Հին Էրիվան ամրոցի տեղում` իր իսկ կառուցած Ռուսական կայսրության կոնյակի առաջին գործարանում: Այս արտադրությունը գոյատևեց մինչև 1899թ.:

Հայկական կոնյակ

Նիկոլայ Թաիրովը դժվարանում էր կազմակերպել առաքումը, հետևաբար իր գործը վաճառեց ռուս արդյունաբերող Նիկոլայ Շուստովին: Վերջինս վերազինեց գործարանը և արտադրանքը շուկա հանեց: Կազմակերպվեց նաև գովազդային մեծ արշավ: Արդյունքում Շուստովի արտադրանքն ամուր դիրքեր գրավեց ռուսական շուկայում:

Հայկական կոնյակ

1912թ. Շուստովի կոնյակը ներկայացվեց Փարիզի ցուցահանդեսում, որտեղ նրան շնորհվեց Գրանպրի մրցանակ: Ներկայացված ապրանքի բարձր որակի համար Շուստովին թույլատրվեց իր արտադրանքը վաճառել կոնյակ անունով և ոչ բրենդի, ինչը թույլատրվում էր միայն Կոնյակ գավառում աճող խաղողից ստացված խմիչք արտադրող ընկերություններին:

1913թ. «Շուստով և որդիներ» ընկերությունը դարձավ Ռուսական Կայսրության արքունիքի մատակարար, և հայկական կոնյակն այսպիսով մեծ ճանաչում ստացավ:

Հայկական կոնյակ

Երկրորդ համաշխարհային պատերազմից հետո, 1945թ. Յալթայում տեղի ունեցած գագաթնաժողովի համար Հայաստանում արտադրվեց հատուկ կոնյակ` «Դվին»: Գագաթնաժողովի ժամանակ Ուինսթոն Չերչիլը խնդրեց Ստալինին իրեն կոնյակի որոշ քանակություն վաճառել: Այդ պահից սկսած «ժողովրդի առաջնորդը» անձամբ էր վերահսկում «Դվին» կոնյակի առաքումը Մեծ Բրիտանիայի վարչապետին: Երբ մեկ անգամ Չերչիլին հարցրեցին, թե որն է վերջինինս երկարակեցության գաղտնիքը, նա առանց վարանելու պատասխանեց. «Երբեք մի ուշացեք ճաշին, ծխեք Հավանայի սիգարներ և խմեք հայկական կոնյակ»: Կոնյակի օրինական առաքումը Անգլիա շարունակվեց մինչև սառը պատերազմի սկիզբը, որից հետո այն դադարեցվեց:

Հայկական ծիրան

close

Հայերը շուրջ 3000 տարի է, ինչ աճեցնում են ծիրան: Ծիրանը հիշատակվում է ինչպես հայկական աղբյուրներում, օրինակ` Գառնու տաճարի շրջակայքում պեղումների ժամանակ հայտնաբերված ծիրանի կորիզները, այնպես էլ այլ աղբյուրներում: Դրա ապացույցն է Ասորեստանի երկրորդ թագավոր Սարգոնի /մ.թ.ա. 24-րդ դար/ ձեռագրերում հիշատակված պատմությունն այն մասին, որ նա խնձոր և ծիրան է աճեցրել:

Հայկական ծիրան

«Ծիրան» բառն ունի հին պատմություն: Հռոմեացիները ծիրանն անվանում էին «հայկական խնձոր»: Հենց այդ անվանումն էլ պահպանվել է բուսաբանության մեջ. լատիներեն ծիրանն ունի հետևյալ անունը` Prunus armeniaca կամ Armeniaca vulgaris:

Հայկական ծիրան

Ծիրանի պտուղները պարունակում են բազմաթիվ օգտակար նյութեր, և մարդիկ հաճախ օգտագործում են այս միրգը սիրտ-անոթային համակարգի, լյարդի և երիկամների համար: Այն շատ սննդարար միրգ է և ունի բարձր համային հատկանիշներ: Ծիրանի պտուղները պարունակում են օսլա, օրգանական թթուներ, վիտամին C և այլ օգտակար նյութեր: Ծիրանն օգտագործում են թարմ, չորացրած և պահածոյացված վիճակում: Ծիրանից պատրաստում են հյութեր, կոմպոտներ, մուրաբաներ, ջեմեր և ցուկատներ: Ծիրանի որոշ տեսակներ պարունակում են քաղցր կորիզներ, որոնք օգտագործվում են հրուշակեղենի արտադրության մեջ:

Հայկական ծիրան

Ծիրանենու փայտից պատրաստում են հայկական ամենասիրված և հայտնի երաժշտական գործիքը` դուդուկը /դուդուկը կոչվում է նաև ծիրանափող/: Ներկայումս ծիրան աճեցնում են շատ երկրներում, բայց Հայկական արևով լեցուն և հայոց լեռներից հոսող ջրով սնված հայկական ծիրանն իր համով յուրահատուկ է ու անկրկնելի:

Երաժշտություն

close

Դուդուկը համարվում է հայկական ամենահին և ամենասիրված երաժշտական գործիքը: Այն ամբողջովին արտահայտում է հայ ժողովրդի զգացումներն ու հույզերը: Գործիքն ունի 1900 տարվա պատմություն: Թեև դուդուկ նվագում են Կովկասի շատ երկրներում, նրա հայրենիքը Հայաստանն է:

Երաժշտություն

Դուդուկը պատրաստվում է ծիրանենուց, և Հայաստանում այն հաճախ անվանում են ծիրանափող: Դուդուկի երաժշտության առանձնահատկությունը նրա լիրիկական հնչեղությունն է: Դուդուկն ունի ջերմ ու նուրբ ձայն: Ոչ մի այլ երաժշտական գործիք չի արտահայտում հայ ժողովրդի զգացմունքներն այնքան անկեղծորեն ու ջերմորեն, ինչպես դուդուկը:

Գործիքի արտաքին վերին մասում կա յոթ, իսկ ներքևի մասում` մեկ ձայնային անցք: Սովորաբար երկու դուդուկահարներ միասին են հանդես գալիս: Մեկը մենակատարն է, իսկ մյուսը` դամքաշը, որը ձայնակցում է` կիրառելով անդադար հնչող ձայնով նվագելու հատուկ մեթոդը: Պարային երաժշտության կատարման համար դուդուկին միանում են հարվածային գործիքներ:

Երաժշտություն

Հայաստանի ամենահայտնի դուդուկահարը Ջիվան Գասպարյանն է: Դուդուկն օգտագործվել է հոլիվուդյան, ինչպես նաև բազում այլ ֆիլմերում, ինչպիսք են «Գլադիատորը», «Հիսուսի վերջին գայթակղությունը», «Ագռավը», «Զինա, մարտիկնենի թագուհի» և այլն:

ՄԵՐ ՄԱՍԻՆ

Յուրաքանչյուր տարածաշրջանում մատուցվող կերակուրը տվյալ մշակույթի մի մասն է կազմում և վկայում այն նախասիրությունների մասին, որոնք ձևավորվում են ժամանակի ընթացքում` շփումների միջոցով, ինչպես և պատմական իրադարձությունների բերումով: Լինելով ազգային նկարագրի յուրահատուկ մասը` խոհանոցը նույնպես ենթարկվում է փոխադարձ ազդեցություններին և չի կարող սահմանափակվել մեկ ազգի կամ մեկ մշակույթի ավանդույթներով: Թերևս, դրանով է պայմանավորված, որ «Պանդոկ Երևանի» ստեղծման օրից ձգտել ենք համադրել հայկական ու կովկասյան խոհանոցի լավագույն ավանդույթները: Չէ՞որ, ժամանակի ընթացքում այդ կերակրատեսակներից շատերն ընդունվել են հայերիս կողմից ու դարձել ճաշացանկի մի մասը:

Այսպիսով, հիմնադրման պահից ի վեր մեր առջև խնդիր ենք դրել հաճախորդին առաջարկել այնպիսի ճաշացանկ, որը հարիր է քիմքին, մշակույթին ու սովորույթին, բայց նաև յուրատիպ է, փոքր-ինչ տարբեր: Բայց սա ամբողջական մոտեցման մի կողմն է միայն:

Կարծում եմ, որ նման մոտեցման շնորհիվ`«Պանդոկ Երևանը» մեր հաճախորդներից շատերի համար դարձել է համեղ ուտելիքի և հաճելի միջավայրի մարմնացում: Ինչպես մեր հաճախորդներից մեկն է ասում`«Այստեղ մեզ զգում ենք ինչպես տանը, որտեղ տիրում է անկաշկանդ մթնոլորտ և մշտապես մատուցվում թարմ ու համեղ սնունդ»:

Pandok Yerevan

Your opinion about Tavern Yerevan

Brochure

ՄԵՐ ՀԱՍՑԵՆ

close

Տերյան 91

Սեղանի ամրագրում՝
(010) 508 800, (096) 508 800

Առաքում՝ (010) 600 006

Աշխատանքային ժամեր`
09:30 - 00:00

Էլ. փոստ՝ pr@yeremyanprojects.com

close

Ամիրյան 5

Սեղանի ամրագրում՝
(010) 545 545, (099) 545 545

Առաքում՝ (010) 600 006

Աշխատանքային ժամեր`
09:30 - 00:00

Էլ. փոստ՝ pr@yeremyanprojects.com

close

Պարոնյան 7

Սեղանի ամրագրում՝
(010) 530 563, (091) 530 563

Առաքում՝ (010) 600 006

Աշխատանքային ժամեր`
09:30 - 00:00

Էլ. փոստ՝ pr@yeremyanprojects.com

close

Խորենացի 29/2

Սեղանի ամրագրում՝
(010) 582 512, (099) 550 466

Առաքում՝ (010) 600 006

Աշխատանքային ժամեր`
09:30 - 00:00

Էլ. փոստ՝ pr@yeremyanprojects.com